تونسي موش بالعاني

قامت ثورة وكلانا الكرتوش ، ولادك ماتوا يا تونس وعصافرك ما يموتوش . الخفاش وين كان مخبي ؟ علاش قبل اليوم ما ريتوش ؟ تحب تعيش في الظلمة ، تشري رضاء المولى بسبحة و محرمة ، أمورك ما مدخلنيش ، أخطاني ما تحاربنيش ! في الإسلام سلام ، هالبغض بكلو آش تسميه؟ بقداش من سورة قلبك باش ترقيه ؟ قداش من دمعة خوف ورهبة تكفيه ؟ مستقبل صغيرك باش ناوي تبنيه ؟ ياسمين بلادنا بالدم باش تسقيه ؟ درابونا كان تكسر إنت سيادتك باش تستويه ؟ وجه تونس الحقاني بماء الفرق راك عمرك ما تمحيه تقول شرع الله ، ونحب عالخلافة و الشريعة، بالتقوى تعمل ذريعة، تحل علينا ڨمة وتقول ثنيتنا هي الجنة ، في مغاغر الكره تدفننا ، تتفنن في البغض تسيب ربك وتعبدنا ، تتفرج في تلافز البوخوخو ، تقرا في كتب البودورو ، تقول نتعلم ونعلم ؛ تتكلم تتجلطم ، عايش في فيلم وتفلم ، حل فمك المسوك وبصوتك الحقاني من غير ما توكوك تكلم . السم هذا الكل شكون وكلك ؟ ماك تونسي كيفي ، شكون إلي بدلك ؟ لغتك طلامس ، تقول عاللي موش كيفك كافر و مومس ، زعمة عايش في إيران ولا عايش معانا في تونس ؟؟ تونس بألوانها كبيرة ، تونس ما تخونش ريحتها ، ما تلبسش برقع غيرها ، تونس ما تلوحش صغيرها ! تحب تقلبلها سليختها ، تبول على نوارها ، تبدعلها بحالها ، إطيحلها كارها ، تونس ما تتمسش ، حيوطها الديانات الكل تتنفس ، أضرب أبزق أنحر فرفش بلبز مد السيف إركز سب تعدى ورفس ، إتظاهر خرج الخلايق والمناظر ، تونس بالإختلاف مزيانة ، تونس بالمحبة ديمة مليانة ، وإنت ، الحق عمرك ما تنجم تعفس source: http://insane-chutlibre.blogspot.com/2011/04/blog-post.html